*

Bílar 17. júlí 2018

Æfðu vistvænan akstur

Þrjátíu bílstjórar tóku nýlega þátt í námskeiði í vistvænum akstri hópferðabifreiða.

EvoBus, framleiðandi Mercedes-Benz og Setra hópferðabíla, og Bílaumboðið Askja, umboðsaðili EvoBus á Íslandi, buðu helstu viðskiptavinum sínum á námskeið fyrir ökumenn hópferðabíla í vistakstri (Eco driving). Um 30 bílstjórar tóku þátt í námskeiðinu sem haldið var í Reykjavík og nágrenni í síðustu viku og var blanda af verklegum æfingum og fyrirlestrum í kennslustofu. Við verklegu kennsluna var notast við nýjan 49 sæta, 12 metra Toursimo, sýningarbíl sem Bílaumboðið Askja hefur til umráða fram á sumar.

Kennari á námskeiðinu var Uwe Byer en hann er aðalkennari á akstursnámskeiðum þeim sem Ökuland hefur staðið fyrir í Þýskalandi undafarin ár. „Námskeiðið er blanda af akstri þar sem nemendur aka hópferðabíl í umferð við hefðbundnar aðstæður. Síðan taka þeir bóklegan hluta í kennslustofu þar sem farið er yfir hugmyndafræði vistakstursins og ekki síður öryggisþátt námskeiðsins sem er stór hluti af þessu öllu. Til að byrja með aka allir nemendur einn hring, eins og þeir eru vanir, og sitja allir nemendur í bílnum hver hjá öðrum á meðan. Þegar þessum hring er lokið er farið yfir niðurstöður akstursins hjá hverjum og einum. Farið er m.a. yfir tíma, meðalhraða og eyðslu á eldneyti. Þegar allir hafa lokið þessum fyrri hring er farið aftur í kennslustofuna og bóklegi hlutinn tekinn. Svo er farið út í bíl aftur og allir nemendur aka annan hring. Þá er hægt að bera saman og athuga hvort nemendur geti bætt árangur sinn, stytt aksturstíma, hækkað meðalhraða og lækkað eldsneytiseyðslu. Í langflestum tilfellum hafa nemendur bætt sig á milli ferða, en að sjálfsögðu geta aðstæður haft þar áhrif, m.a. umferð, tafir og fleira,“ segir Uwe en hann hefur komið tvívegis áður til Íslands að kenna ökumönnum á námskeiðum. Það er gott að keyra á Íslandi. Umferðin er þægileg og þetta er eins og að vera í litlum bæ í Þýskalandi en ekki í stórborg þar sem oft er mjög erfitt að keyra. Ísland er líka mjög fallegt land og það er sérlega gaman að keyra út fyrir borgina og sjá þessa alla þessa fallegu náttúru,“ segir Uwe.

Nánar er fjallað um málið í Atvinnubílar, fylgiriti Viðskiptablaðsins. Áskrifendur geta nálgast blaðið undir Tölublöð, aðrir geta skráð sig í áskrift hér.