*

Bílar 15. febrúar 2016

Audi kynnir fjölbreyttar nýjungar

Þýski lúxusbílaframleiðandinn Audi kynnti spennandi nýjungar framtíðarinnar á nýafstaðinni bílasýningu í Detroit.

Róbert Róbertsson

Ein aðalstjarnan í framtíðaráformum Audi er vetnisbíll sem gengur undir vinnuheitinu Audi h-tron quattro concept og var frumsýndur á bílasýningunni í Detroit á dögunum.

Bíllinn státar af fimmtu kynslóð efnarafgjafatækni frá Audi og Volkswagen og dregur allt að 600 kílómetra við bestu hugsanlegu aðstæður. Með Audi h-tron er sýnt fram á hversu mikil tækifæri felast í tækninýjungum í efnarafgjöfum.

Tengiltvinnbíllinn A3 e-tron frá Audi hefur átt góðu gengi að fagna frá því að hann kom fyrst fram á sjónarsviðið árið 2104 og í mars mætir Audi Q7 e-tron tengiltvinnbíllinn til leiks.

Árið 2018 ætlar Audi síðan að hefjast handa við framleiðslu á rafmagnsjepplingum í verksmiðju fyrirtækisins í Brussel. Forsmekkurinn af slíkum hreinum rafmagnsbílum var sýndur fyrst á bílasýningunni í Frankfurt í fyrra í formi Audi e-tron quattro concept.

Hvað stærð varðar verða rafmagnsjepplingarnir staðstettir á milli Q5 og Q7 í vörulínu Audi. Þeir verða búnir þremur rafmagnshreyflum og afkastamiklum rafgeymi.

Útlitið verður sportlegt og þeir munu bjóða upp á um 500 kílómetra drægni og hraðhleðslu. Í verksmiðjunni í Brussel hyggst Audi einnig hefja framleiðsla á rafgeymum og mun hún því gegna lykilhlutverki í rafvæðingu hjá fyrirtækinu.

Stikkorð: Audi  • Bílar  • Quattro