*

Bílar 21. júlí 2018

Fer 300 km á hleðslunni

Nissan hefur búið e-NV200, einn mest selda rafknúna sendibíl Evrópu, nýrri og öflugri 40kWh rafhlöðu sem hefur 60% meiri drægni en eldri rafhlaðan.

Róbert Róbertsson

Nissan hefur búið e-NV200, einn mest selda rafknúna sendibíl Evrópu, nýrri og öflugri 40kWh rafhlöðu sem hefur 60% meiri drægni en eldri rafhlaðan og skilar hún bílnum um 300 km á hleðslunni miðað við nýja mælistaðalinn WLTP. Rafhlaðan er jafnstór og eldri útgáfan og skerðist því flutningsrými sendibílsins ekki á nokkurn hátt. Fyrstu bílarnir eru væntanlegir til BL í lok júlí og eru allir uppseldir. 

Nissan e-NV200 er framleiddur í verksmiðju fyrirtækisins í Barcelona og hafa tæplega fimm þúsund bílar með nýju rafhlöðunni verið pantaðir frá því í janúar, þar á meðal hingað til lands. Sem stendur eru flestir kaupendanna í stórborgum Spánar og annarra Evrópulanda þar sem borgaryfirvöld eru farin að setja takmarkanir á umferð bensín- eða dísilknúinna fólks- og sendibíla í miðborgunum.

Framtíðarlausn í stórborgum

Gareth Dunsmore, yfirmaður rafbíla hjá Nissan Europe, segir engan vafa leika á því að rafknúin ökutæki séu framtíðarlausnin í stórborgum heimsins enda hafi þau í för með sér stórbætt loftgæði þar sem bílaumferð sé mikil. „Sendibílar gegna mikilvægu hlutverki í þjónustu við fyrirtæki í miðborgunum, hvort sem er við veitingastaði, hótel eða aðra aðila og hér getur rafknúni sendibíllinn Nissan e-NV200 lagt mikið til við að bæta loftgæðin," segir Dunsmore, en e-NV200 er nú þegar mest seldi rafknúni sendibíllinn í Evrópu. Í heild eru um átján þúsund slíkir bílar í notkun á heimsvísu.

Nánar er fjallað um málið í Atvinnubílar, fylgiriti Viðskiptablaðsins. Áskrifendur geta nálgast blaðið undir Tölublöð, aðrir geta skráð sig í áskrift hér

Stikkorð: Nissan  • BL