*

Bílar 3. maí 2018

Fyrsta sjálfstýrða bílnum reynsluekið

Farþegar í fyrsta akstri bifreiðarinnar voru m.a. Sigurður Ingi Jóhannsson samgönguráðherrra og Dagur Eggertsson borgarstjóri.

Fyrsta sjálfstýrða bifreiðin á Íslandi var til sýnis og reynslu á ráðstefnunni Snjallborgin Reykjavík, sem fram fer í Hörpu í dag. Bifreiðinni var ekið stutta leið í kringum Hörpu að því er segir í fréttatilkynningu. Farþegar í fyrsta akstri bifreiðarinnar voru m.a. Sigurður Ingi Jóhannsson samgönguráðherrra og Dagur Eggertsson borgarstjóri. 

Bifreiðin er rafknúin og kemst allt að 100 kílómetra á hverri hleðslu og er hámarkshraði ríflega 40 km á klukkustund. Eins og nafnið gefur til kynna er enginn undir stýri, þar sem ekkert er stýrið, en bifreiðin er forrituð fyrir ákveðna leið og skynja leysigeislar umhverfi bílsins. Bifreiðin er frá danska fyrirtækinu Autonomous Mobility og kemur hingað til lands á vegum bifreiðaumboðsins Heklu, en danska fyrirtækið Semler Group á eignarhlut í báðum fyrirtækjum.

„Við leitumst við að horfa til þess hvernig bílar framtíðarinnar verða og framtíðarsýn okkar er skýr; að koma með lausn á því hvernig fólk kemst milli staða með sem hagkvæmasta og vistvænasta hætti. Sjálfkeyrandi bílar eru næsta skref,“ er haft eftir Peter Sorgenfrei, framkvæmdastjóri Autonomous Mobility, í tilkynningunni en hann hélt erindi á Snjallborgin Reykjavík í dag.

,,Það er afar ánægjulegt að fyrsta sjálfkeyrandi bifreiðin hafi verið prófuð hér á Snjallborgarráðstefnunni í dag þar sem verið er að ræða framtíð Reykjavíkur og hvaða nýjungar eru framundan í innviðum og þjónustu borgarinnar. Tæknin er komin mjög langt. Þetta snýst fyrst og fremst um vakningu varðandi innviði og lög og reglugerðir sem snúa að sjálfkeyrandi bílum þannig að við verðum tilbúin fyrir þessa sjálfstýrðu framtíð sem er handan við hornið," er einnig haft eftir Kristni Jóni Ólafssyni, verkefanstjóri Snjallborgar hjá Reykjavík.