*

Menning & listir 15. febrúar 2018

Harlem dans í snjónum á Flúðum

Tugir erlendra og innlendra dansara væntanlegir til Flúða á fyrstu íslensku Lindy hop vetrardanshátíðina sem hefst í dag.

Búist er við fjölda erlendra og innlendra dansara á alþjóðlegu Lindy hop danshátíðina Lindy on Ice sem haldin verður í fyrsta skipti á Flúðum og í Reykjavík fimmtudaginn 15. febrúar til sunnudagsins 18. febrúar 2018. 

Á hátíðinni, sem er sú fyrsta sinnar tegundar hér á landi, verður boðið upp á sóló-jazz og Lindy hop kennslu fyrir byrjendur og lengra komna undir leiðsögn þriggja af fremstu sveifludönsurum heims. Nánar má lesa um hátíðina á facebook síðu hennar.

Þá munu tvær af frambærilegustu sveifluhljómsveitum landsins, „Siggi Swing & His Bluesberries“ og „HG Quintet“ með Hauk Gröndal í fararbroddi, leika fyrir dansi öll kvöld hátíðarinnar en með þeim mun stíga á stokk sérstakur gestur frá New York, ástralski saxófón- og klarínettleikarinn Adrian Cunningham, margverðlaunaður djasstónlistarmaður sem um þessar mundir leiðir eina eftirsóttustu Lindy hop hljómsveit veraldar. 

Kennsla og útsýnisferðir undir norðurljósum

Auk danskennslu og dansleikja verður gestum hátíðarinnar boðið upp á útsýnisferðir um helstu kennileiti Suðurlands, slökun í heitum náttúrulaugum, gönguferðir um nágrennið og, ef vel viðrar, verður hægt að dansa undir berum himni við sindrandi norðurljós. 

Félagsheimilið á Flúðum verður í forgrunni á hátíðinni en þar mun Lindy on Ice hafa bækistöðvar sínar frá fimmtudegi til laugardags. Lokadansleikur hátíðarinnar verður svo haldinn með pompi og pragt í Iðnó í Reykjavík sunnudagskvöldið 18. febrúar. Vert er að taka fram að dansleikirnir verða opnir öllum almenningi. 

Að baki Lindy on Ice standa tveir meðlimir Lindy Ravers, áhugamannafélags um iðkun Lindy hop á Íslandi, en tilgangur hátíðarinnar er einkum og sér í lagi að stuðla að virkara sveiflutónlistar- og sveifludanssamfélagi á Íslandi og efla með því menningarlegan fjölbreytileika. 

Allir eru velkomnir á hátíðina, hvort heldur byrjendur með litla sem enga dansreynslu eða lengra komnir.

Dansinn upruninn í Harlem

Lindy hop hefur verið dansað um allnokkurt skeið á Íslandi en rekur uppruna sinn til Harlem í New York þar sem hann varð til meðal svartra íbúa hverfisins undir lok þriðja áratugar 20. aldar. Þaðan breiddist dansinn út og þróaðist samhliða uppgangi sveiflutónlistarinnar á fjórða áratugnum. 

Frægt er hvernig hann sameinaði svarta og hvíta á þessum tíma á dansstöðum eins og Savoy-danshöllinni í Harlem þar sem ólíkum kynþáttum var leyft að dansa saman en þá ríkti nær allsstaðar blátt bann við slíku. 

Þegar tími sveiflutónlistarinnar leið undir lok um miðbik aldarinnar hvarf dansinn nánast alveg af sjónarsviðinu. Þremur áratugum síðar var hann endurvakinn af dansáhugafólki og hefur síðan þá breiðst út. 

Í dag er Lindy hop dansað út um allan heim og nýtur síaukinna vinsælda fólks á öllum aldri sem vílar ekki fyrir sér að ferðast heimshorna á milli til að sækja helstu hátíðirnar heim. Það er markmið skipuleggjenda að gera Lindy on Ice að árlegum viðburði.

Stikkorð: Flúðir  • Lindy Hop  • Lindy Ravers