*

Hitt og þetta 22. nóvember 2017

Háskólakona ársins valin í fyrsta sinn

Dr. Unnur Anna Valdimarsdóttir er fyrsta Háskólakona ársins.

Háskólakonur fjölmenntu á Hótel Holt í gær þegar tilkynnt var um val á Háskólakonu ársins í fyrsta sinn. Stjórn Félags háskólakvenna ákvað á 89 ára afmæli félagsins að heiðra árlega eina háskólakonu fyrir framlag sitt til samfélagsins. Leitað var til félagskvenna og háskólasamfélagsins um tilnefningar og bárust fjölmargar ábendingar um konur sem skarað hafa fram úr á sínu fagsviði og verið öðrum háskólakonum góðar fyrirmyndir.

Fyrir valinu nú varð Dr. Unnur Anna Valdimarsdóttirprófessor við læknadeild Háskóla Íslands. Hún hefur komið að fjölmörgum rannsóknum síðastliðin 20 ár sem margar beinast að áhrifum hvers kyns áfalla á heilsu fólks. Unnur Anna hefur hlotið veglega rannsóknarstyrki til að kanna samspil erfða og heilsufarlegra afleiðinga alvarlegra sálrænna áfalla, nú síðast 2 milljóna evra styrk frá Evrópska rannsóknarráðinu. Styrkurinn er mikil viðurkenning á vísindalegu framlagi Unnar Önnu. Framlag hennar til vísindanna er óumdeilt en niðurstöður rannsókna hennar hafa birst í ýms­um virt­ustu tíma­rit­um heims á viðkom­andi fræðasviðum.  

Dr. Unnur Anna lauk BA gráðu í sálfræði við Háskóla Íslands 1996 og doktorsgráðu í klínískri faraldsfræði við Karolinska Institutet í Svíþjóð árið 2003. Hún hefur verið prófessor við HÍ frá 2012 og var varaforseti læknadeildar á árunum 2013-2017. Frá árinu 2009 hefur hún einnig starfað við Harvard School of Publich Health.

Félag háskólakvenna og kvenstúdenta var stofnað árið 1928 og verður því 90 ára á næsta ári. Margt hefur breyst í menntunarmálum landsmanna á þessum 89 árum og staða háskólakonunnar í dag allt önnur en hún var við stofnun félagsins. Stofnfélagar voru aðeins fimm og segir það nokkru til um hversu fáar konur höfðu þá lagt í langskólanám. Háskólakonur hafa margar hverjar náð langt á sínum fræðasviðum og unnið ótal áfangasigra sem margir hafa þó farið fram hjá hinum almenna borgara. Með því að heiðra nú árlega eina háskólakonu fyrir framlag sitt til samfélagsins vill stjórn Félags háskólakvenna vekja athygli á ólíkum störfum og afrekum félagskvenna sinna svo það megi verða hvatning öðrum konum sem stunda langskólanám.