*

Sport & peningar 15. maí 2018

Hlíðarendi mun bera nafn Origo

Origo og Valur fara í samstarf um uppbyggingu á Hlíðarenda, og í tæknilausnum fyrir mannvirki félagsins.

Knattspyrnufélagið Valur og upplýsingatæknifyrirtækið Origo hafa gert með sér samstarfsamning sem snýr að uppbyggingu á Hlíðarendasvæðinu. Íþróttahús og keppnisvöllur Vals munu bera nöfnin Origo höllin og Origo völlurinn að Hlíðarenda næstu árin.

Origo mun jafnframt vinna með Val að tæknilausnum fyrir núverandi íþróttamannvirki og félagsaðstöðu, framtíðarmannvirki félagsins auk Hlíðarendasvæðisins í heild sinni.

Finnur Oddsson forstjóri Origo segir afar spennandi uppbyggingu eiga sér stað á Hlíðarendasvæðinu nú, hvort sem horft sé til íþróttastarfs eða annarra mannvirkja. „Valur er félag sem býr yfir sterkum innviðum, ríkri arfleið í íslenskum íþróttum og hyggur á stóra hluti á komandi árum,“ segir Finnur.

„Í komandi uppbyggingu er þörf á samstarfsaðila sem getur veitt öflugar tæknilausnir og tengda þjónustu og við hjá Origo eru spennt að fylgja Valsmönnum og -konum inn í nýja tíma."

Valur í hjarta Reykjavíkur

Þorgrímur Þráinsson formaður Vals segir félagið bjóða Origo velkomið að Hlíðarenda og að það væntir mikils af samstarfinu.
„Valur er í hjarta Reykjavíkur, sannkallaður fólkvangur, þar sem allir eru velkomnir,“ segir Þorgrímur.

„Félagið horfir til framtíðar enda spennandi tímar svo langt sem hugurinn nær og því kemur samstarfið við Origo sér einstaklega vel. Orðið Origio er latína og þýðir uppruni en það kallast á við merkilega sögu Vals því við megum aldrei gleyma uppruna félagsins, þeim sem vörðuðu veginn."