*

Bílar 5. september 2017

Honda CR-V fær tvinnvél

Á bílasýningunni í Frankfurt í lok september mun Honda kynna útfærslu á vinsælum jeppling með tvinnvél í fyrsta skipti.

Honda mun kynna jepplinginn vinsæla CR-V í Hybrid útfærslu á bílasýningunni í Frankfurt síðar í mánuðinum. Þetta er í fyrsta skipti sem Honda prófar Hybrid tvinnvél í jeppling en fólksbíllinn Honda Accord hefur m.a. verið framleiddur í Hybrid útgáfu.

CR-V jepplingurinn verður í boði bæði með 2 lítra tvinnvél sem samanstendur af tveimur rafmótorum og bensínvél. Stærri bensínvélin skilar samtals 145 hestöflum og 175 Nm í togi en samanlagt með rafmótorunum skilar tvinnvélin 215 hestöflum. Þá verður einnig hægt að fá jepplinginn með minni 1,5 lítra tvinnvél.

Bíllinn verður með þrjú aksturskerfi; EV Drive, Hybrid Drive og Engine Drive. Í EV Drive ekur bíllinn eingungis á rafmagninu en í hinum tveimur síðarnefndu kemur bensínvélin einnig til sögunnar. Bíllinn er væntanlegur á markað á næsta ári. Honda hefur tilkynnt að CR-V verði ekki lengur framleiddur með dísilvélum fyrir Evrópumarkað.

Stikkorð: Frankfurt  • Honda  • CR-V  • bílasýning  • bensín  • rafknúinn  • tvinnvél