*

Bílar 4. júlí 2018

Kia kynnti nýjan Kia Niro EV

Kia kynnti nýjan Kia Niro EV sem er hreinn rafbíll á bílasýningunni í Busan í Suður-Kóreu.

Kia kynnti nýjan Kia Niro EV sem er hreinn rafbíll á bílasýningunni í Busan í Suður-Kóreu. Bíllinn verður formlega frumsýndur á alþjóðlegu bílasýningunni í París í haust en hann mun koma á markað í byrjun næsta árs. Þetta er ný útgáfa af Kia Niro EV sem fæst nú þegar í Hybrid og Plug-in Hybrid útfærslum.

Kia Niro EV er með nýjum og tæknivæddum 64 kWh lithium rafhlöðupakka sem skilar bílnum rúmum 200 hestöflum og drægni upp á alls 450 km. Kia Niro EV mun einnig vera fáanlegur í útfærslu þar sem drægnin er 300 km  og 39,2 kWh  lithium rafhlöðu. Sá bíll verður með rafmótor uppá 150 hestöfl. Drægnin miðast við bestu hugsanlegu aðstæður samkvæmt upplýsingum frá suður-kóreska bílaframleiðandanum og nýjustu reglur við mælingar á drægni (WLTP). Kia Niro EV er með engan útblástur þannig að um er að ræða bæði afar umhverfisvænan og og hagkvæman bíl. Þetta er annar hreini rafbíllinn sem Kia framleiðir en fyrir er rafbíllinn Kia Soul EV. Kia Niro EV er hannaður í hönnunarstöðvum Kia í Kaliforníu og Namyang í Suður-Kóreu.

Kia mun bjóða 16 rafknúna bíla árið 2025 sem verða hreinir rafbílar, Hybrid eða Plug-in Hybrid útfærslur. Þá hyggst Kia kynna fyrsta vetnisknúna bíl fyrirtækisins árið 2020.

Stikkorð: Bílar  • Kia Niro EV