*

Bílar 26. nóvember 2014

Kia Soul frumsýndur í raf- og dísilútgáfum

Gestum á frumsýningu Kia Soul hjá Bílaumboðinu Öskju gefst kostur á reynsluakstri bifreiðanna. Þeir verða frumsýndir á laugardag.

Róbert Róbertsson

Kia Soul verður frumsýndur bæði í raf- og dísilútgáfum hjá Bílaumboðinu Öskju nk. laugardag, 29. nóvember kl. 12-16.

Kia Soul er nettur fjölnotabíll sem er byggður á undirvagni bifreiðarinnar Kia cee’d. Kia Soul er hábyggðari en fólksbílar af svipaðri stærð sem þýðir að auðvelt er að stíga inn og út úr honum auk þess sem sætin eru há og útsýni gott. Dísilútgáfan af Kia Soul er með 1,6 lítra dísilvél sem skilar bílnum 128 hestöflum.

Kia Soul EV er rafmagnsútgáfan af bílnum og hefur 212 km drægni við bestu hugsanlegar aðstæður. Kia Soul EV er knúinn 81,4 kw rafmótor sem skilar 111 hestöflum og 285 NM togi til hjólanna. Bíllinn er innan við 12 sekúndur úr kyrrstöðu í hundraðið en hámarkshraði hans verður um 145 km/klst. Í bílnum verður búnaður er endurnýtir hemlunarorku og skriðorku og skilar henni til rafgeymanna.

Heimahleðslustöð fylgir Soul EV en það tekur um 4-5 klukkustundir að hlaða bílinn í henni. Með kapli sem fylgir bílnum og tengist í venjulega innstungu tekur 11-14 klst að full hlaða. Með 100 kílóvatta hraðhleðslustaur tekur aðeins 25 mínútur að hlaða bílinn upp í 80% hleðslu.

Báðar útgáfurnar af Kia Soul eru með sjö ára ábyrgð en hún tekur einnig til rafhlöðu bifreiðarinnar. Kia Soul EV verður afar vel búinn m.a. með íslensku leiðsögukerfi, bakkmyndavél, nálægðaskynjurum að framan og aftan, leðursætum, hita í sætum frammí og afturí. Kia Soul EV verður einnig vel búinn öryggisbúnaði og m.a. með svonefndum VESS-búnaði er sendir frá sér vélarhljóð til viðvörunar á undir 20 km/klst ferð og ávallt þegar bakkað er.

Boðið verður upp á léttar veitingar í Öskju í tilefni frumsýningarinnar og gestum gefst kostur á að reynsluaka báðum útfærslunum af Kia Soul.