*

Bílar 10. janúar 2018

Lúxuspallbíll frumsýndur

Mercedes-Benz X-Class hefur verið beðið með talsverðri eftirvæntingu.

X-Class er fyrsti pallbíllinn frá lúxusbílaframleiðanda sem kemur á markað. X-Class er búinn miklum lúxus í innanrýminu og mun meira en venja er í þessum flokki bíla. Mercedes-Benz hefur lagt sig fram við að gera bílinn sérlega góðan hvað varðar aksturseiginleika og þægindi eins og við er að búast frá þýska lúxusbílaframleiðandanum. Hönnun pallbílsins þykir hafa tekist mjög vel. Hann er kraftalegur en um leið með fallegar línur. Að aftan eru LED ljósin mjög áberandi.

X-Class er í boði með aflmiklum 2,3 lítra dísilvélum. Sú stærri skilar 190 hestöflum og togar 450 Nm en sú minni skilar 163 hestöflum og með henni er bíllinn 10,9 sekúndur úr kyrrstöðu í hundraðið.

X-Class hefur burðargetu upp á 1,1 tonn og dráttargetu upp á tæp 3,5 tonn. Bíllinn er fjórhjóladrifinn og með hátt og lágt drif sem nýtist sérlega vel fyrir erfiðar akstursaðstæður. X-Class kemur á 30 tommu dekkjum en Arctic Trucks mun í samstarfi við Öskju framkvæma 33 og 35 tommu breytingar á X-Class ef þess er óskað og mun fyrirtækið annast alla þjónustu fyrir þá kaupendur sem vilja slíkar breytingar.

Bíllinn verður frumsýndur bæði í höfuðstöðvum Öskju að Krókhálsi 11 og einnig í húsnæði atvinnubíla Öskju að Fosshálsi nk. laugardag klukkan 12-16.