*

Veiði 11. apríl 2018

Meðlþyngd fiska eykst í Laxárdal

Stangveiðifélag Rekjavíkur mun halda kynningarkvöld á föstudaginn þar sem fjallað verður um fiskinn í Laxárdal.

36% aukning var á fjölda veiddra fiska í Laxá í Laxárdal í S-Þingeyjarsýslu á síðasta sumri. Um 650 urriðar komu á land og var meðalþyngdin með því hæsta sem þekkist í íslenskum ám, þar sem 82% veiðinnar var yfir 50 sm að lengd og 37% yfir 60 sm. 

Veiðitölurnar eru sérstaklega áhugaverðar í ljósi þess að sókn í ánna var minni en fyrri ár, sem höfðu einkennst af nokkrum samdrætti í veiðinni. Eftirvæntingin fyrir komandi sumri er því mikil, enda vonast veiðimenn til að viðsnúningur til hins betra sé kominn til að vera og aðgerðir til verndar stofninum í ánni verði varanlegar.

Þetta er meðal þess sem fjallað verður um á kynningarkvöldi, sem Stangveiðifélag Reykjavíkur efnir til á föstudaginn kl. 20.  Þar munu veiðileiðsögumennirnir Bjarni Höskuldsson, Hrafn Ágústsson og Ásgeir Steingrímsson fjalla um fiskinn í Laxárdal, þá einstöku stemningu sem skapast við stórfiskaveiðina í dalnum og gefa veiðimönnum góð ráð fyrir komandi sumar. Veiðileyfi verða á tilboðsverði, áhugavert veiðispjall verður í boði og efni til fluguhnýtingar fyrir byrjendur og lengra komna. 

“Þeir veiðimenn sem kynnast Laxárdalnum falla algjörlega fyrir honum, enda er það einstök upplifunin að kljást við stóran og sterkan urriða. Ég hef veitt og leiðbeint veiðimönnum í ánni í rúmlega 20 ár og á þeim tíma hefur mikil breyting orðið í veiðinni. Fiskurinn hefur stækkað mikið, sem vegur svo sannarlega upp fjöldatöluþróun á tímabilinu. Það er óviðjafnanlegt að kljást við 65-70 sm urriða í straumvatni og ég vona að sem flestir veiðimenn fái slíkan draum einhvern tímann uppfylltan. Laxárdalurinn er besti staðurinn til þess,” er haft eftir Bjarna Höskuldssyni, veiðileiðsögumanni í tilkynningu.