*

Bílar 1. febrúar 2013

Metsala hjá Porsche

Salan hjá Porsche hefur aukist þrjú síðastliðin ár. Porsche Cayenne seldist best allra bíla.

Róbert Róbertsson

Fleiri Porsche sportbílar seldust á árinu 2012 en nokkru sinni fyrr í sögu þýska framleiðandans. Alls voru afhentir 141.075 Porsche sportbílar sem er 18,7% aukning frá árinu 2011. Þetta þykir eftirtektarverður árangur í ljósi efnahagskreppunnar.

Söluaukning Porsche var yfir 10% á öllum markaðssvæðum en mest var hún í Asíu og Kyrrahafslöndunum þar sem afhentir voru 50.376 nýir bílar sem er 23,6% aukning. Í Evrópu jókst salan um 13,5%. Kínamarkaður hefur einnig verið að opnast fyrir Porsche og þar seldust í fyrsta sinn yfir 30.000 bílar á einu ári. Í Bandaríkjunum jókst sala á Porsche um 20,7%. Á heimamarkaði, í Þýskalandi, naut Porsche einnig mikillar velgengni þar sem vinsældir 911, Cayenne, Panamera, Boxster og Cayman eru miklar. Þar nam aukningin tæpum 17%.

„Sala á Porsche hefur aukist á hverju ári síðastliðin þrjú ár. Á þessu tímabili hefur salan aukist um 83,9%. Árið 2012 var það árangursríkasta í sögu fyrirtækisins,“ segir Matthias Müller, forstjóri og aðalframkvæmdastjóri Porsche.

911 Carrera var sá bíll sem naut mestu söluaukningar hjá Porsche á síðasta ári eða alls 31,4%. Það er hins vegar Cayenne sportjeppinn sem er söluhæsta einstaka gerðin. Alls seldust 74.763 bílar á síðasta ári sem er 24,8% aukning. Porsche hyggur á mikla markaðssetningu á þessu ári með nýjum tvinnbílum, eins og t.d. 918 Spyder og sportjeppanum Macan.