*

Bílar 5. júní 2015

Nýr Audi Q7 boðar komu sína í ágúst

Nýr Nýr Audi Q7 mun lenda hér á landi í ágúst en nýju kynslóð lúxusjeppans hefur verið beðið með talsverðri eftirvæntingu.

Róbert Róbertsson

Audi Q7 er mikið uppfærður og setur ný viðmið í flokki lúxusjeppa hvað varðar aksturseiginleika, upplýsingakerfi og aðstoðarkerfi fyrir ökumann. Nýi jeppinn kemur meðal annars með nýjung sem kallast "Audi virtual" mælaborði og nýju "MMI" kerfi með stóru snertiborði sem auðveldar alla stýringu. Hann er einnig einn af fyrstu bílunum sem býður upp á tengimögluleika við Google Android Auto og Apple CarPlay. Nýr Audi Q7 er í fremstu röð þegar kemur að aðstoðarkerfum. Hann getur til að mynda lagt sjálfur í stæði, séð um að bakka með kerru og keyrt sjálfur í umferðaröngþveiti. Enginn annar fjöldaframleiddur bíll bíður upp á fleiri aðstoðarkerfi sem valkost.

Útfærsla á vélum Audi Q7 er til fyrirmyndar fyrir aðra fjórhjóladrifna jeppa. Dísilvélin 3.0 TDI er 272 hestöfl og bensínvélin 3.0 TFSI 333 hestöfl sem skila nýjum Audi Q7 frá 0-100 km/klst á 6,1 sekúndu (TFSI) og 6,3 sekúndum (TDI).

Þýska lúxusbílaframleiðandanum hefur tekist að að létta nýjan Audi Q7 um 325 kíló. Af því leiðir minni eldsneytisnotkun og snerpa sem kemur á óvart miðað við svo stæðilegan og rúmgóðan bíl. Nýr Audi Q7 með dísilvél eyðir um 26% minna en fyrirrennarinn og kneyfar aðeins 5,7 lítra af eldsneyti á hundraði í blönduðum akstri. Co2 útblástur vélarinnar er 149 gr./km. sem kemur Audi Q7 á toppinn í flokki lúxusjeppa. Samkvæmt upplýsingum frá Heklu, umboðsaðila Adui á Íslandi, verður verðið á nýjum Q7 frá um 11,8 milljónum kr.

Í byrjun næsta árs verður Audi Q7 fylgt eftir með Audi Q7 e-tron quattro. Þar er um að ræða fyrsta tengitvinnbíllinn frá Audi sem verður í boði með dísilvél. Hann verður 373 hestöfl og skilar 700 Nm togi. Þetta er jafnframt fyrsti dísil tengitvinnbíllinn sem býður upp á fjórhjóladrif í flokki lúxusjeppa. Uppgefin eldsneytiseyðsla er aðeins 1.7 lítri á 100 km og undir 50 gr. á hvern kílómetra í útblæstri (Co2). Fullhlaðin rafhlaða dregur allt að 56 kílómetra samkvæmt upplýsingum frá framleiðanda.

Stikkorð: Audi  • Q7