*

Tölvur & tækni 21. september 2017

Nýr tölvuleikur með Daða Frey

Tölvuleikurinn Neon Planets með Daða Frey í aðalhlutverki kemur út í App Store og Google Play á morgun.

Föstudaginn 22.september kemur út í App Store og Google Play tölvuleikurinn Neon Planets en leikurinn er framleiddur af íslenska tölvuleikjaframleiðandanum Rosamosa ehf. og skartar tónlistarmanninum Daða Frey í aðahlutverki. Leikurinn innheldur þrjú splunkuný lög frá Daða Frey og má í rauninni segja að hér sé um að ræða einskonar blöndu af gagnvirkri tónlistarútgáfu og tölvuleik. Spilarinn slæst í för með Daða um litríkar neon plánetur með það að markmiði að næla í nótur sem vantar til að fullkomna lögin. Á leið sinni þarf spilarinn að forðast slæmar nótur og keppast við að næla sér í stig og verðlaun.

Daði Freyr skaust heldur betur upp á stjörnuhimininn eftir þáttöku sína í undankeppni Eurovision þar sem hann sló eftirminnilega í gegn ásamt hljómsveitinni Gagnamagninu. Daði Freyr er þessa dagana búsettur í Berlín með Árnýju Fjólu en hann vinnur nú hörðum höndum að sinni fyrstu EP plötu auk þess sem hann sem tónlist fyrir auglýsingar og stuttmyndir.

Tölvuleikjaframleiðandinn Rosamosi ehf. hefur getið sér gott orð fyrir framleiðslu á tónlistartölvuleikjum fyrir börn undir nafninu Mussila. Neon Planets ft. Daði Freyr er fyrsti leikurinn í nýrri vörulínu sem höfðar til eldri spilara þó prófanir hafi leitt í ljós að börn hafi ekki síður gaman af en fullorðnir.

Neon Planets ft. Daði Freyr er fáanlegur bæði í App Store og Google Play. http://www.mussila.com/neon-planets/ https://www.facebook.com/neonplanets