*

Bílar 22. ágúst 2018

Nýr Kia Ceed frumsýndur

Nýr Kia Ceed verður í boði með tveimur bensínvélum annars vegar er ný 1,4 lítra, 140 hestafla T-GDI bensínvél og þá verður einnig 1,0 lítra bensínvél í boði.

Nýr Kia Ceed verður frumsýndur í Bílaumboðinu Öskju næstkomandi laugardag þann 25. ágúst. Bíllinn kemur nú í talsvert breyttri mynd, hann hefur fengið nýtt útlit að innan sem utan og þá hefur ýmsum tækninýjungum verið bætt við bílinn til að bæta aksturseiginleika og öryggi.

Nýr Ceed er með kraftmiklum og sportlegum línum og tígrisnefið, sem er einkennismerki Kia bíla, er breiðara á framgrillinu en í forveranum. Innanrýmið er nútímalegt, sportlegt og notendavænt. Tæknivæddur snertiskjár býður upp á það helsta varðandi afþreyingu og er auk þess tengdur bakkmyndavél og leiðsögukerfi. Innanrýmið er rúmbetra en áður og farangursrýmið stærra en í forveranum eða 395 lítrar. 

Kia Ceed verður í boði með tveimur bensínvélum annars vegar er ný 1,4 lítra, 140 hestafla T-GDI bensínvél og þá verður einnig 1,0 lítra bensínvél í boði sem er mjög spræk og skilar 120 hestöflum. Bíllinn verður búinn nýjustu aksturs- og öryggiskerfum frá Kia. Bíllinn verður að sjálfsögðu með 7 ára ábyrgð eins og allir aðrir nýir Kia bílar.

Nýr Kia Ceed er hannaður í hönnunarmiðstöð Kia í Frankfurt undir stjórn Peter Schreyer, yfirhönnuðar og eins af forstjórum fyrirtækisins. Kia hefur unnið til fjölda verðlauna fyrir hönnun á bílum sínum á síðustu árum og er smíðaður sérstaklega fyrir Evrópumarkað í verksmiðju Kia í Zilina í Slóvakíu. Verksmiðjan er ein sú fullkomnasta í Evrópu.

Síðan bíllinn kom fyrst á markað í desember árið 2006 hafa selst tæplega 1,3 milljónir eintaka af bílnum. Þar hafa selst rúmlega 640 þúsund eintök af annarri kynslóð bílsins sem kom á markað árið 2012. 

Nýr Kia Ceed Sportwagon mun síðan koma á markað í haust en þar er um ræða langbaksútfærslu af bílnum sem býður upp á enn meira farangursrými eða alls 625 lítra sem með því stærsta í sínum flokki.

Stikkorð: Kia  • Ceed