*

Bílar 20. desember 2016

Nýr og uppfærður Mazda 3

Nýr Mazda 3 er væntanlegur í nýrri og uppfærðri útfærslu í byrjun nýs árs.

Nýr Mazda 3 er væntanlegur í nýrri og uppfærðri útfærslu í byrjun nýs árs. Þessi netti bíll frá japanska bílaframleiðandanum hefur verið vinsæll hér á landi sem og annars staðar.

Útlit og innrétting hafa verið uppfærð ásamt ýmsum tæknilegum nýjungum. Helstu breytingar eru nýr og breyttur framendi, ný framljós, nýtt grill og stuðari. Í innra rými bílsins er nýtt mælaborð, uppfært margmiðlunarkerfi og rafdrifin handbremsa er nú staðalbúnaður Mazda 3. Þar með losnar mikið af plássi í miðjustokk bílsins sem nýtist sem aukið geymslurými.

Með þessum bíl er kynnt til sögunnar nýtt og fullkomið stýrikerfi, svokallað G-Vectoring Control (GVC) sem gerir tengingu ökumanns og bíls enn nánari. GVC minnkar þörf ökumanns til að vera stöðugt að leiðrétta stýrisstefnu og minnkar þar með óumbeðnar hreyfingar hjá ökumanni og farþegum. Kerfið stuðlar þannig að enn betri aksturseiginleikum og eykur vellíðan allra farþega um borð. GVC kerfið stýrir ýmsum kerfum bílsins eins og vélartölvu, t.a.m. með breytingu á togkrafti vélar, stýrissvörun og mörgu fleira. Markmiðið er að ökutækið hafi sem best veggrip og  þyngdardreifing og G- þyngdarkraftar hafi sem minnst áhrif á ökuhæfni bíls og ökumanns.