*

Bílar 30. mars 2016

Nýr Porsche 919 Hybrid

Porsche hefur nú kynnt nýja útgáfu - þá þriðju - af 919 Hybrid bíl sínum í Frakklandi.

Porsche hreppti heimsmeistaratitilinn í þolakstursmótaröðinni í fyrra með Porsche 919 Hybrid bílnum, en þetta var aðeins í annað skiptið sem Porsche tók þátt í keppninni eftir langt hlé.

Mikil pressa er því á að Porsche endurtaki leikinn í ár. Af því tilefni afhjúpaði Porsche nú á dögunum nýjan fulltrúa sinn í þolaksturskeppnum ársins, erfiðustu þolraunum sem ökumenn og bílasmiðir taka þátt í á hverju ári.

Porsche kynnti þar til sögunnar þriðju kynslóðina af 919 Hybrid bílnum í Frakklandi á dögunum og miðað við þær tæknilegu breytingar sem gerðar hafa verið á bílnum er ljóst að ekkert verður slegið af hjá Porsche í ár og bílaframleiðandinn í Stuttgart er tilbúinn í að verja titilinn.

Í fáum orðum má segja að helsta þróunin milli kynslóða felist öðru fremur í meira vélarafli, breytilegu straumlínulagi, sem hægt er að aðlaga loftmótstöðunni á mismunandi keppnisbrautum og svo í þyngdarminnkun sem náðst hefur fram í nokkrum bíl- og vélarhlutum.

Á frumsýningu nýja 919 Hybrid bílsins var haft eftir Fritz Enzinger hjá Porsche: ,,Þessi nýja 900 hestafla orkusprengja er klár í titilvörnina í þolaksturskeppnum ársins."

Stikkorð: Bílar  • Porsche  • Hybrid  • Turbo  • 919