*

Bílar 7. janúar 2019

Nýr sportbíll úr smiðju Porsche

Hinn nýi Porsche 718 Cayman GT4 Clubsport er 425 hestöfl og fæst í bæði keppnis- og brautardagsútgáfu.

Nýr Porsche 718 Cayman GT4 Clubsport hefur verið kynntur til leiks þremur árum eftir að forverinn var fyrst settur á markað.

Bíllinn er byggður á sama hátt og áður, þ.e. keppnisbíll með miðjusettan mótor. Þessi gerð er nokkuð nálægt bílum ætluðum á almennan markað. Hinsvegar eru nú fáanlegar tvær útgáfur bílsins: “Trackday” útgáfa ætluð metnaðarfullum leikmönnum í kappakstri sem og “Competition” útgáfa sem ætluð er til að etja kappi á kappakstursbrautum.

Við þróun 718 Cayman GT4 Clubsport var ekki einvörðungu einblínt á hraðari aksturstíma og uppsetningu bílsins til brautaraksturs, heldur var einnig horft mikið til uppruna og endurnýtanleika þeirra hráefna sem í smíðina fóru. Því er Porsche 718 Cayman GT4 Clubsport fyrsti fjöldaframleiddi kappakstursbíllinn sem notar ýmiskonar endurnýtanleg og umhverfisvæn hráefni til smíðarinnar.

718 GT4 Clubsport er knúinn áfram af 3,8 lítra flötum sex-cýlendra, 425 hestafla mótor og er það aukning um heil 40 hestöfl frá fyrri útgáfu bílsins. Aflinu er skilað í afturhjólin með hjálp sex gíra tvíkúplungsskiptingar Porsche, PDK, og læsingu afturdrifs. Fjöðrunarbúnaður að framan er fenginn að láni frá stóra bróður eða 911 GT3 Cup bílnum og bremsudiskarnir eru heilir 380 millimetrar að þvermáli.

“Trackday” útgáfunni er beint að leikmönnum í kappakstri með þáttöku í minni aksturskeppnum og svokölluðum “Clubsport” kappakstri án þess að til komi mikil fjárútlát, rekstur og útgerð meðan “Competition” útgáfunni er svo beint að reyndari ökumönnum með þáttöku í stærri keppnum fyrir augum enda bíllinn og útgerð hans töluvert dýrari.