*

Menning & listir 22. júní 2018

Ólafur Darri og Ilmur hlaupa til góðs

Þau munu ásamt fjölda annarra leikara hvetja landsmenn til að taka þátt í Reykjavíkurmaraþoni og leggja góðum málefnum lið.

Í dag fer af stað stærsta herferð Íslandsbanka á árinu sem er fyrir  Reykjavíkurmaraþon Íslandsbanka og hlaupastyrk þar sem hægt er að leggja góðum málefnum lið með því að heita á hlaupara. Í gegnum árin hafa landsþekktir einstaklingar verið í forsvari fyrir maraþonið og vakið athygli á góðgerðafélögum. Í fyrra var set met í áheitasöfnun þegar söfnuðust yfir 118 milljónir til 152 félaga. Þetta kemur fram í fréttatilkynningu frá Íslandsbanka.

Í ár mun hópur landsþekktra leikara vera í forsvari fyrir hlaupastyrk en verkefnið er að frumkvæði Ólafs Darra Ólafsson og Ilmar Kristjánsdóttur. Þau munu ásamt fjölda annarra leikara hvetja landsmenn til að taka þátt í Reykjavíkurmaraþoni og leggja góðum málefnum lið. 

Enginn leikaranna fær greitt fyrir þátttöku í auglýsingunni eða verkefninu sem slíku en Íslandsbanki heitir á góðgerðafélögin sem þau hlaupa fyrir. Auglýsingin verður frumsýnd í hálfleik í leik Íslands og Nígeríu á HM, sem hefst klukkan 15 í dag.