*

Menning & listir 24. september 2018

Orðin tekjuhæsta íslenska mynd ársins

Lof mér að falla er orðin 4. vinsælasta mynd ársins en 34 þúsund gestir séð myndina sem er á leið í sýningu í S-Kóreu.

Eftir að hafa verið 17 daga í sýningu er Lof mér að falla orðin fjórða vinsælasta mynd ársins, en 34 þúsund manns hafa nú séð hana. Hún situr nú sem fastast á toppi aðsóknarlistans sína þriðju helgi í röð og er orðin tekjuhæsta íslenska mynd ársins.

„Svo sannarlega frábær aðsókn hjá þessari mögnuðu mynd sem hefur vakið gríðarlega athygli og einróma lof gagnrýnenda og gesta - hér heima og erlendis,“ segir Jón Gunnar Geirdal í Ysland. 

Jón Gunnar segir að framundan hjá leikstjóra, aðalleikurum og framleiðendum myndarinnar sé að fylgja myndinni eftir á kvikmyndahátíðina Busan í S-Kóreu. Þar mun Lof mér að falla taka þátt í World Cinema hluta hátíðarinnar.

Busan er stærsta kvikmyndahátíð Asíu og fer fram 4.-13.október , en þetta er Asíu frumsýning myndarinnar.   

Segir frá 15 ára stúlku í ógöngum

Myndin segir frá hinni 15 ára gömlu Magneu en líf hennar umturnast þegar hún kynnist hinni átján ára gömlu Stellu. Magnea laðast að hispurslausu lífi Stellu og þróar Magnea sterkar tilfinningar til hennar sem Stella notfærir sér til eigin hagsbóta.

Stella leiðir Magneu inn í heim fíkniefna sem hefur alvarlegar afleiðingar fyrir þær báðar. 12 árum síðar liggja leiðir þeirra óvænt saman og verður uppgjör á milli þeirra óumflýjanlegt.