*

Tíska og hönnun 11. desember 2017

Pantone kynnir lit ársins

Liturinn þykir konunglegur og kvenlegur en er einnig sterkt tengdur við sköpunargáfu.

Pantone kynnir til leiks lit ársins en litur ársins 2018 er Ultra Violet eða Útfjólublár og ber litaheitið PANTONE 18-3838. Útfjólublár þykir sterkt tengdur tónlist í gegnum Jimi Hendrix og Prince en einnig tækni og vísindum enda sé útfjólublátt ljós nýtt við rannsóknir hinna fjarlægustu vetrarbrauta. Hið ágæta fólk hjá Pantone les þó enn dýpri merkingu í þennan fallega lit. Leatrice Eiseman, forstöðumaður hjá þessari virtu litastofnun segir:

„Við búum á tímum sem krefjast uppáfinningar og hugmyndaauðgi. Það er einmitt slík skapandi andagift sem er litnum PANTONE 18-3838 eðlislæg, bláleitur fjólublár sem lyftir vitund okkar og möguleikum á hærra plan. Frá könnun nýrrar tækni og himingeimsins til listrænnar tjáningar og andlegrar íhugunar, innsæi Útfjólablás lýsir leiðina sem framundan er.“ Ekki nein smáræðis lýsing frá höfuðbóli litafræðinnar.

Daníel Imsland hönnunarstjóri Hype auglýsingastofu er spenntur fyrir valinu. „Þetta er virkilega skemmtilegt val hjá þeim í ár og ljóst að fjólublár hefur verið þeim hugleikinn hjá Pantone á árinu en í ágúst tilkynntu þeir t.d. að listamaðurinn Prince sem lést í fyrra fengi sinn eigin fjólubláa lit „Love Symbol #2“. Útfjólublár er mun bjartari og meira lifandi en hefðbundinn fjólublár og fyrir mitt leyti er hann mun markaðsvænni en Pantone litir síðustu nokkurra ára.“ segir Daníel og bætir við: „Fjólublár hefur almennt yfir sér lúxusbrag, þykir konunglegur og kvenlegur en er einnig sterkt tengdur við sköpunargáfu og hið andlega. Þessi útgáfa er klárlega meira spennandi og síður íhaldssöm en hinn klassíski fjólublái. Ég sé fyrir mér að við munum sjá töluvert af útfjólubláum á árinu.“