*

Ferðalög 19. desember 2017

Reykjavík valin ævintýra- og vetraráfangastaður Evrópu

Á jafnframt möguleika á að vera valin Ævintýraáfangastaður alls heimsins árið 2018.

Reykjavík hefur verið valin Ævintýraáfangastaður Evrópu fyrir árið 2018 (Adventure Destination of the Year) af fagtímaritinu Luxury Travel Guide (LTG).

Þetta er annað árið í röð sem þetta virta tímarit verðlaunar Reykjavík sem áfangastað en borgin var valin Vetraráfangastaður Evrópu á þessu ári. Dómnefnd LTG er skipuð fagfólki á ýmsum sviðum ferðaþjónustunnar og í umsögn kemur fram að Reykjavík sé menningarborg, í stórbrotnu landslagi með norðurljósadýrð og fjölbreytta afþreyingu. Fjölskylduferð til Reykjavíkur sé uppskrift að spennandi ævintýrum og einstökum minningum sem enginn eigi að láta fram hjá sér fara.

Í umsögn dómnefndar fyrir árið 2018 kemur fram að viðurkenningin sé einungis veitt til þeirra sem eru framúrskarandi á sínu sviði út frá ítarlegum kröfum fagfólks. Með því sé tryggt að einungis þeir áfangastaðir eða fyrirtæki fái viðurkenningu sem beri af. Reykjavíkurborg megi vera afar stolt yfir að hafa náð þeim árangri að vera valin Ævintýraáfangastaður Evrópu árið 2018.  

Í viðurkenningunni fyrir árið 2018 felst m.a. forsíðugrein í tímariti LTG um Reykjavík og ferðaþjónustu á hér á landi. Tímaritinu verður dreift til yfir 500 þúsund áskrifenda, á tíu þúsund lúxushótel, á setustofur flugvalla, skemmtiferðaskip og ferðaskrifstofur um allan heim. Þá verður fulltrúum Reykjavíkurborgar boðið að koma og taka á móti viðurkenningunni á sérstakri verðlaunaathöfn tímaritsins þar sem Reykjavík á jafnframt möguleika á að vera valin Ævintýraáfangastaður alls heimsins árið 2018.

Luxury Travel Guide (LTG) er tímarit um lúxusferðamennsku. Þar er að finna fréttir, greinar og umsagnir um fyrirtæki, stofnanir og áfangastaði sem bjóða uppá ferðaþjónustu. Á hverju ári veitir tímaritið viðurkenningar til þeirra sem það telur að hafi skarað framúr á hinum ýmsu sviðum ferðamennskunnar.

„Það er mikill heiður fyrir Reykjavíkurborg að skara fram úr með þessum hætti á alþjóðavísu. Fagtímaritið Luxury Travel Guide veitir nú borginni viðurkenningu annað árið í röð og ljóst að sú framþróun sem hefur orðið síðustu ár á áfangastaðnum Reykjavík vekur heimsathygli. Þetta er jafnframt viðurkenning á þeim árangri sem við höfum náð í kynningu og markaðssetningu á borginni þar sem áherslan hefur verið á að kynna þá fjölbreyttu afþreyingu  og menningu sem er til staðar. Þetta er einnig mikil viðurkenning fyrir ferðaþjónustuna hér á land,“ segir Áshildur Bragadóttir forstöðukona Höfuðborgarstofu