*

Tölvur & tækni 18. apríl 2018

Segja Eve fanfest ekki verða á Íslandi

Frá upphafi hefur árleg hátíð spilara EVE Online tölvuleiksins frá CCP verið haldin hér á landi en nú horfir til breytinga.

Íslenska tölvuleikjafyrirtækið CCP hefur ákveðið að bregða út af hefðinni og ekki halda næstu hátíð aðdáenda leiksins hér á landi líkt og verið hefur frá upphafi. Hefur hin svokallaða EVE Fanfest hátíð dregið til sín fjölda spilara leiksins alls staðar að úr heiminum, en síðustu ár hefur hátíðin verið haldin í Hörpu.

Nú hafa skipuleggjendur hátíðarinnar ákveðið í fyrsta sinn að hátíðin verði ekki hér á landi, heldur verði hún á mörgum mismunandi stöðum í heiminum. Einn af stöðunum verður jafnvel á heimili einhvers spilara og nærliggjandi svæði að því er segir á heimasíðu ShackNews.

Verður hægt að sækja um að fá hátíðina til síns heimilis með því að senda myndband til CCP til að sannfæra stjórnendur leiksins að koma með leikinn til þeirra. Þó leikurinn haldi ekki hátíð sína á Íslandi á næsta ári, eru svipaðar hátíðir nú þegar haldnar víða um heim, eins og í Ástralíu, Evrópu, Las Vegas og jafnvel á austurströnd Bandaríkjanna.

Stikkorð: Harpa  • CCP  • Eve Online  • tölvuleikur  • hátíð