*

Bílar 11. september 2017

Snjallsími á hjólum

Í bílasýningunni í Frankfurt kynnir Volkswagen nýja hugmyndabílinn I.D. Cross Concept, sem gengur fyrir rafmagni eingöngu og hefur dræfni upp á 500 kílómetra.

Volkswagen kynnir nýja hugmyndabílinn I.D. Cross Concept á bílasýningunni í Frankfurt. Flottur bíll þótt nafnið sé skrítið hjá bílaframleiðandanum í Wolfsburg.

Volkswagen I.D. Cross Concept var fyrst kynntur á bílasýningunni í Shanghai en nú er það frumraunin í Evrópu og víst er að þessi bíll mun fá mikla athygli eins og margir hugmyndabílar gera jafnan á stóru bílasýningunum.

Þessi sportjeppi frá Volkswagen er framúrstefnulegur í hönnun og á að ganga fyrir rafmagni eingöngu. Drægnin er sögð vera um 500 km við bestu aðstæður og bíllinn á að ná 180 km hámarkshraða. Rafhlöðurnar eiga að ná 80 prósent hleðslu á hálftíma samkvæmt upplýsingum frá framleiðanda.

Bíllinn mun vera mjög tæknivæddur og Volkswagen gengur svo langt að kalla hann snjallsíma á hjólum. Volkswagen Group ætlar sér stóra hluti í rafbílavæðingunni og hefur sett stefnuna á 30 nýja rafbíla fyrir árið 2025.