*

Bílar 4. október 2018

Tæta um á tryllitækjum

Á tryllitækjasýningu Kvartmíluklúbbsins um helgina má búast við mörg þúsund hestöflum.

Kvartmíluklúbburinn heldur tryllitækjasýningu næstkomandi laugardag og sunnudag í Brim húsinu við Reykjavíkurhöfn.

Alls um 60 tryllitæki verða til sýnis af ýmsum stærðum og gerðum. Hér er um að ræða marga mjög flotta og kraftmikla bíla sem sjást alla jafna ekki á götunum.

Allir þessara bíla eru með mjög öflugt vopnabúr undir húddinu og má búast við að mörg þúsund hestöfl verði þarna samanlagt á sýningunni. Hún verður opin frá klukkan 11-18 báða dagana. Aðgangseyrir er 1500 kr.

Kvartmíluklúbburinn var stofnaður 6. júlí 1975. Síðustu ár hefur verið mikil uppbygging á akstursíþróttasvæði klúbbsins í Kapelluhrauni í Hafnarfirði og hann styrkst og eflst samhliða því. Búið er að stækka kvartmílubrautina, gera svæðið fjölbreyttara og enn frekari uppbygging er framundan í Kapelluhrauni í Hafnarfirði.