*

Bílar 13. október 2017

Tengiltvinnbíll frá Mini frumsýndur

Umboð fyrir bílaframleiðandann Mini verður formlega kynnt sem nýtt merki hjá BL nk. laugardag.

Mini er dótturfyrirtæki BMW Group sem hefur staðið fyrir umtalsverðri þróun á þessu sögufræga og vinsæla merki frá árinu 1994 þegar fyrirtækið var keypt frá Bretlandi.

Nýr aldrifinn tengitvinnbíll, Mini Cooper S E Countryman ALL4, verður frumsýndur á bílasýningu BL klukkan 12-16 á laugardag. Mini Cooper S E Countryman ALL4 er fyrsti aldrifni bíll Mini og jafnframt fyrsti tengitvinnbíllinn. Nýr Countryman er heldur stærri en eldri gerðir bílsins en svo sannarlega býr hann yfir sömu rómuðu aksturseiginleikunum sem Mini hefur alla tíð verið hvað þekktastur fyrir.

Mini Cooper S E Countryman ALL4 er búinn tveimur vélarkostum. Rafmótorinn er 65 kW og 88 hestöfl sem skilar 165 Nm togi. Hámarkshraði á rafstillingu er allt að 125 km/klst og drægni mótorsins er um 40 km. Hinn aflgjafinn er 1,5 lítra þriggja strokka 100 kW og 136 hestafla bensínvél með forþjöppu við sex gíra steptronic sjálfskiptingu. Tog vélarinnar er um 220 Nm við 1.250-4.300 snúninga á mínútu. Saman skila aflgjafarnir 165 kW og 224 hestöflum og samsvarar sameiginleg orkunotkun þeirra rúmum tveimur lítrum 100/km að meðaltali. Kolefnisútblástur er um 50 grömm á hvern ekinn kílómetra samkvæmt stöðluðu prófi ESB fyrir tengiltvinnbíla.

Meðal tæknilausnanna er eDrive kerfi BMW ásamt rafknúnu aldrifinu þar sem bensínvélin knýr framhjól bílsins og rafmótorinn afturhjólin.