*

Menning & listir 18. október 2017

Tosca sett á svið hér á landi

Óperan Tosca eftir Giacomo Puccini er ein allra ástsælasta ópera sem samin hefur verið.

Óperan Tosca eftir Giacomo Puccini er ein allra ástsælasta ópera sem samin hefur verið. Tosca fjallar um ástir, afbrýði og átök í skjóli umbyltingatíma í pólitík. Tónlistin í óperunni er rómantísk og einstaklega áhrifarík enda er verkið alltaf jafn vinsælt. Með hlutverk í Tosca fara Claire Rutter, Kristján Jóhannssson, Ólafur Kjartan Sigurðarson, Bergþór Pálsson, Þorsteinn Freyr Sigurðsson, Fjölnir Ólafsson, Sigurbjartur Sturla Atlason og Ágúst Ólafsson.

Íslenska óperan setur Tosca á svið og TVG-Zimsen hafa undirritað samstarfssamning þess efnis að flutningafyrirtækið mun flytja leikmyndir til landsins fyrir Íslensku óperuna næstu misseri. TVG-Zimsen sá um allan flutning á leikmyndinni fyrir óperuna Tosca sem frumsýnd verður í Eldborgarsal Hörpu næsta laugardagskvöld.


,,Við erum afar stolt af samstarfinu við Íslensku óperuna og að geta stutt við bakið á glæsilegum menningarviðburðum sem Íslenska óperan stendur fyrir. Við fluttum leikmyndina fyrir óperuna Tosca að utan og beint í Hörpu. Þetta er krefjandi verkefni enda stór og glæsileg leikmynd fyrir þessa frægu óperu. Að sama skapi er þetta mjög skemmtilegt verkefni og við erum full tilhlökkunar alveg eins og flytjendur og allir óperuunnendur fyrir frumsýningunni á laugardagskvöld," segir Björn Einarsson, framkvæmdastjóri TVG-Zimsen.