*

Sport & peningar 23. febrúar 2018

Veðurguðirnir stoppuðu ekki hlaupara

Í hlaupaseríu Bose og FH sem fram fór í gærkvöldi voru þau Arnar Pétursson og Andrea Kolbeinsdóttir, bæði í ÍR, fyrst.

Hlauparar létu kulda og éljagang ekki stoppa sig í hlaupaseríu FH og Bose sem fram fór í Hafnarfirði í gærkvöld. Alls 266 hlauparar tóku þátt og hlupu 5 km leið um Hafnarfjörð í snjóföl sem lá yfir bæinn. Hlaupið hófst við Strandgötuna og síðan var hlaupið með fram stranglengjunni og Norðurbakkanum og snúið við á Herjólfsgötu og hlaupið til baka.

Arnar Pétursson ÍR sigraði í karlaflokki en hann hljóp á tímanum 16:50. Þórólfur Ingi Þórsson ÍR varð annar á 17:39 og Ingvar Hjartarson, Fjölni/Adidas, þriðji á 17:44. Í kvennaflokki sigraði Andrea Kolbeinsdóttir ÍR á tímanum 19:14, í öðru sæti varð Elín Edda Sigurðardóttir ÍR á 19:54 og í þriðja sæti varð Agnes Kristjánsdóttir á 20:28.

„Þetta er metþátttaka hjá okkur í febrúarhlaupi í hlaupaseríunni,” segir Hörður J. Halldórsson, formaður hlaupahóps FH. „Það er gaman að sjá hversu margir eru að mæta hjá okkur í hlaupaseríuna og sérstaklega miðað við veður. Með tilkomu Origo sem samstarfsaðila þá hefur náðst að efla hlaupið til muna og lyfta því á hærra plan.“