*

Sport & peningar 19. september 2017

„Veit að þetta verður besti bardaginn á ferlinum“

Stórt bardagakvöld fer fram í London, laugardagskvöldið 7. október. Í aðalbardaga kvöldsins berst Bjarki Þór Pálsson (3-0) á móti öflugum andstæðing Quamer Hussein (6-2).

Bjarki Þór Pálsson (3-0) er einn farsælasti atvinnubardagamaður okkar Íslendinga segir í fréttatilkynningu sem Mjölnir sendi frá sér um bardagann. Sem áhugamaður sigraði hann 11 bardaga og tapaði einungis einum. Hann varð Evrópumeistari áhugamanna í veltivigt undir árslok 2015 og eftir það steig hann stóra skrefið yfir í atvinnumennskuna. Þremur bardögum síðar er Bjarki Þór enn ósigraður og nú hefur sá fjórði verið staðfestur 7. október í Lundúnaborg. Andstæðingur hans er hinn breski Quamer “Machida” Hussein (6-2). Quamer þessi þykir afar öflugur bardagmaður og er talsvert reynslumeiri en Bjarki Þór. Bardagi þeirra, sem fram fer í léttvigt, verður aðalbardagi Fightstar Championship 12 bardagakvöldsins sem fram fer í Brentford Fountain Leisure Center sem er um 2000 manna salur í suð-vestur London.

„Ég er gríðarlega sáttur með að vera búinn að fá svona öflugan andstæðing og að búið sé að ganga frá þessu öllu saman. Ég barðist seinast í apríl og það er alveg orðið tímabært að fara aftur í búrið og halda þessu ævintýri áfram,”segir Bjarki Þór og bætir við; „Ég er í frábæru formi núna. Ég er að fara aftur í léttvigt, en í seinustu tveim bardögum hef ég barist í veltivigt sem er þyngdarflokkurinn fyrir ofan, 7 kílóum þyngri. Ég er því léttari, sneggri og snarpari, en hef alveg viðhaldið styrknum. Sjálfstraustið er í botni og bara veit að þetta verður besti bardaginn minn á ferlinum.”

Fleiri Íslendingar berjast sama kvöld

Bjarki Þór verður ekki eini íslendingurinn á þessum viðburði þar sem þrír aðrir úr okkar röðum eru þegar búnir að fá sína andstæðinga staðfesta. Ísfirðingurinn Bjarki “Big Red” Pétursson (1-0) mætir Felix Klinkhammer (4-0) í -81 kg “catchweight” áhugamanabardaga, Þorgrímur “Baby Jesus” Þorgrímsson (1-0) mætir Dalius Sulga (4-3) í veltivigtaráhugamannabardaga og Akureyringurinn Ingþór Örn Valdimarsson (0-1) fer í sinn annan atvinnubardaga gegn hinum pólska Dawid Panfil (0-0) í millivigt. Samningaviðræður eru í gangi fyrir fleiri íslenska bardagamenn um að berjast á þessum sama viðburði og gæti farið svo að þeir yrðu sjö talsins ef allt gengur eftir. Nánar verður frá því sagt þegar staðfestingar berast.

„Það er ótrúlega gaman að við séum svona margir að fara að berjast á sama bardagakvöldinu. Við erum allir að æfa saman og erum að hjálpa hvor öðrum eins og við getum. Það eru svo margir góðir íslenskir bardagamenn að slíta barnsskónnum um þessar mundir og bara á þessu eina bardagakvöldi gætu verið allt að fjórir atvinnubardagar með Íslenskum bardagamönnum ef allt gengur eftir. Það þykir mér vera saga til næsta bæjar,“segir Bjarki Þór.

Í apríl þegar Bjarki Þór barðist seinast í London þá voru rúmlega 50 Íslendingar með í för sem hvöttu hann rækilega til dáða.

„Það var ómetanlegt að hafa svona marga víkinga með mér. Hávaðinn í þeim var gríðarlegur og ég fann bara hvað það veitti mér mikla orku að hafa þetta fólk hinum megin við búrið, öskrandi mig áfram. London er stutt frá, flugið er ódýrt og eins og gengið er núna þá er bara ekkert svo dýrt að skella sér í helgarferð þangað, kíkja á bardaga og gera fleira skemmtilegt. Mig langar allavega að hvetja sem flesta til að koma og hvetja okkur áfram. Fightstar Championship bardagasambandið er hraðast vaxandi sambandið í Evrópu um þessar mundir og kvöldin sem þeir halda eru mjög flott og faglega framkvæmd,“ segir Bjarki Þór.

Hræringar í íslenska bardagabransanum

Fram til þessa þá hefur bardagafélagið Mjölnir setið nokkurnveginn eitt að kjötkötlunum hvað varðar íslenska keppendur í MMA/ blönduðum bardagalistum. Bjarki Þór hefur megnið af sínum ferli í íþróttinni verið meðlimur í keppnisliði Mjölnis og sama gildir um flesta þá sem munu berjast í London 7. október. Þessi hópur sagði hinsvegar skilið við Mjölni fyrir um tveim mánuðum síðan og hyggst stofna nýtt bardagafélag í Reykjavík á næstu mánuðum.

„Okkur fannst fókusinn í Mjölni vera að dofna hvað það varðar að efla það bardagafólk sem vildi keppa og komast langt innan íþróttarinnar. Félagið er búið að stækka svo hratt og er orðið svo fjölmennt að það er alveg skiljanlegt að áherslurnar séu lagðar á að láta reksturinn ganga og þjóna sem flestum. Það rímar hinsvegar ekki alveg við þarfir okkar sem erum að reyna að byggja okkur upp líf og starf í gegnum íþróttina. Eftir viðskilnaðinn, sem fram fór í mesta bróðerni, þá höfum við æft víðsvegar um bæjinn og erum við þeim afar þakklátir sem hafa opnað sínar dyr fyrir okkur. Það er svo sannarlega breið samstaða á milli bardagafólks á Íslandi og við munum kappkosta að standa vörð um hana fram veginn. Margt er enn ófrágengið hvað okkar fyrirætlanir varðar og við munum kynna þær betur síðar. Það sem skiptir máli akkúrat núna eru bardagarnir okkar 7. október, þar sem við berjumst fyrir hönd sjálfs okkar og sem fulltrúar lands og þjóðar en ekki ákveðins íþróttafélags,“ segir Bjarki Þór að lokum.