Fasteignafréttir eru sérstaklega auðskilið og vinsælt fréttaefni á vefsíðum miðlanna. Enda þurfa flestir að velta þessum málum fyrir sér og upphæðir eru innan skilningarvits venjulegs launafólks.

Þannig var frétt á mbl.is á þriðjudaginn að Kristín Ólafsdóttir, eiginkona Björgólfs Thors Björgólfssonar, hefði keypt bjálkahús í Mosfellsbæ.

Þeir sem hafa búið erlendis og eiga gjaldeyri geta núna náð hagstæðari kaupsamningi en þeir sem sitja uppi með krónur. Skipti þeir gjaldeyri í krónur fyrir einu húsi geta þeir fengið mismuninn á aflands- og álandsgengi krónunnar greiddan hjá Seðlabankanum. Það er kallað fjárfestingarleiðin. Og það munar um það hvort þú færð 240 eða 167 krónur fyrir evruna þegar um háar upphæðir er að ræða.