Stjórnarmyndunarviðræður á Grikklandi ganga vel, að sögn Evangelos Venizelos, leiðtoga Sósíalista á Grikklandi. Hann býst við að ný ríkisstjórn verði kynnt til sögunnar í kvöld. Líklegt þykir að Antonis Samaras, leiðtogi hægriflokksins Nýja lýðræðisflokksins, setjist í stól forsætisráðherra.  

Venizelos var fjármálaráðherra Grikklands þegar þáverandi stjórn skrifaði upp á alþjóðlega lántöku sem skikkaði Grikki til að taka á sig harkalegan niðurskurð í ríkisfjármálum. Ráðamenn evruríkjanna hafa lagt á það mikla áherslu að við stjórnartaumum á Grikklandi taki ríkisstjórn sem styðji áframhaldandi þátttöku landsins í myntbandalagi Evrópu og frekari niðurskurð. Skuldavandi Grikkja og annarra evruríkja var í brennidepli á fundi þjóðarleiðtoga 20 helstu iðnríkja heimsins í Mexíkó í vikunni.

Í netútgáfu bandaríska stórblaðsins New York Times segir, að líklegt þyki að George Zannias hverfi úr stóli fjármálaráðherra og við honum taki Vassilis Rapanos, seðlabankastjóri Grikklands.