Miðvikudagur, 16. apríl 2014
 
TölublöðVenjuleg útgáfa

Dómstóll bannar sölu Samsung Galaxy spjaldtölvunnar

27. júní 2012 kl. 08:53

Steve Jobs forstjóri Apple kynnir nýja iPad tölvu þann 27. janúar 2010.

Apple hefur sakað Samsung um að stela hönnun iPad spjaldtölvunnar. Samsung Galaxy tölvan er einni helsti keppinautur iPad.

Bandarískur dómstóll hefur lagt bann við sölu Samsung Galaxy Tab 10.1 spjaldtölvum. Bannið stendur yfir þar til dómstóllinn kemst að niðurstöðu í einkaleyfadeilu Samsung og Apple.

Apple hefur ásakað Samsung um að hafa brotið á einkaleyfi iPad með því að líkja eftir útliti spjaldtölvunnar vinsælu. Þetta kemur fram á vef breska ríkisútvarpsins BBC í dag. Þar segir jafnframt að helstu greiningaraðilar telji Samsung spjaldtölvuna einn helsta keppinaut iPad.

Í tilkynningu frá Samsung segir að fyrirtækið muni taka þessi nauðsynlegu lagalegu skref og að ekki sé gert ráð fyrir að bannið skaði reksturinn.

Þetta er ekki fyrsta málið sem kemur upp á milli fyrirtækjanna en þau hafa ítrekað sakað hvort annað um að stela ýmsum hönnunar- og tækniatriðum. Þetta er hins vegar í fyrsta sinn sem öðru fyrirtækinu tekst að ná fram sölubanni á hitt.