Ráðgjafarfyrirtækið Expectus hagnaðist um 66,5 milljónir króna í fyrra. Hagnaðurinn jókst um 90% milli ára. Handbært fé frá rekstri fyrirtækisins þrefaldaðist milli ára og nam 73 milljónum króna á síðasta ári.
Félagið greiddi hluthöfum sínum 35 milljónir króna í arð. Það er minna en árið 2014 þegar arðgreiðslur námu 53 milljónum. Eignir Expectus námu í lok síðasta árs 155 milljónum króna og jukust um helming milli ára. Þar af nam handbært fé 69 milljónum króna. Eigið fé nam 77,8 milljónum í lok síðasta árs.
Stærsti eigandi Expectus er félagið Promigo ehf., en framkvæmdastjóri fyrirtækisins er Anna Björk Bjarnadóttir.