Miðvikudaginn 11. október kannaði FÍB verð á umfelgun hjá 40 dekkjaverkstæðum vítt og breitt um landið. Hjá flestum fyrirtækjunum eða 24 er verið að bjóða sama verð fyrir þjónustuna núna og í vorkönnun FÍB 2017, en átta fyrirtæki hafa lækkað verðið frá því vor og átta hækkað.
Spurt var: Hvað kostar umfelgun og jafnvægisstilling á fjórum 16 tommu álfelgum. Beðið var um listaverð án allra afslátta eða sérkjara eins og t.d. FÍB afsláttar, eldri borgara aflsláttar o.s.frv. segir í fréttatilkynningu frá félagi íslenskra bifreiðaeigenda.
Tæplega 4.500 króna munur á hæsta og lægsta verði
Það skal tekið tekið fram að sum fyrirtækin í könnunni gefa enga afslætti á þau verð sem gefin eru upp. Miðið var við dekkjaskipti á Toyota Corolla með hjólastærð 205/55 R16, sem er ein algengasta hjóla- og dekkjastærð fólksbíla á íslenska markaðnum.
Í könnunni á þessu hausti var lægsta verðið gefið upp hjá Títancar í Kópavogi eða 5.000 krónur. Hæst var það hins vegar í N1 9.493 krónur.
Ekki löglegt að vera með nagla fyrr en eftir mánaðarmót
Þann 1. nóvember gengur hinn formlegi vetrardekkjatími í garð, þegar löglegt verður að aka á negldum vetrarhjólbörum. Samkvæmt hefðinni má reikna með mikilli ös á hjólbarðaverkstæðum á þessu degi sem að þessu sinni ber upp á miðvikudag.
Eins og alltaf má síðan reikna með að mikið verði að gera í hjólbarðaskiptum þegar fyrsti snjórinn fellur.
Könnunin fór fram í gegnum síma. Spurt var um listaverð á vinnu við umfelgun og jafnvægisstillingu á fjórum 16 tommu álfelgum.
Eingöngu var kannað verð á þessari tegund bifreiðaþjónustu. Ekki var lagt mat á gæði þjónustunnar og mögulegan mun á henni. Einvörðungu var miðið við álfelgur enda eru þær undir stærri hluta fólksbíla.
