Kristjón Kormákur Guðjónsson, aðalritstjóri DV, hefur sagt upp störfum. Þetta staðfesti hann í samtali við Vísi.is . Kristjón segir að erfitt sé að kveðja góða vini á fréttastofu DV en tími hafi verið kominn á nýja áskorun. Kristjón hefur verið ráðinn til starfa hjá Hringbraut.
„Það var í rauninni bara kominn tími til að gera eitthvað annað. Þetta er erfitt starf sem er unnið allan sólarhringinn,“ sagði Kristjón í samtali við Vísi. Hann hefur gegnt stöðu aðalritstjóra í rúmlega eitt ár.
Kristjón kveðst spenntur fyrir nýjum tímum hjá Hringbraut, en hlutverk hans þar verður að blása lífi í vef miðilsins.
Loks segist hann hlakka mjög til samstarfsins við Sigmund Erni Rúnarsson sjónvarpsstjóra en hann mun mæta til vinnu á Hringbraut á morgun.
