*

miðvikudagur, 21. nóvember 2018
Innlent 21. nóvember 2013 10:35

Aðstoðar ráðherra við afnám hafta

Benedikt Gíslason hefur verið ráðinn aðstoðarmaður Bjarna Benediktssonar.

Ritstjórn

Benedikt Gíslason, framkvæmdastjóri bankasviðs MP banka, hefur látið af störfum til að taka við starfi sem aðstoðarmaður Bjarna Benediktssonar fjármála- og efnahagsráðherra. Störf Benedikts fyrir ráðherra munu m.a. snúa að ráðgjöf um framkvæmd áætlunar um afnám gjaldeyrishafta og tengd mál. 

Í tilkynningu frá MP banka kemur fram að starfsskyldur og réttindi Benedikts gagnvart bankanum falla niður frá og með deginum í dag. Gísli Heimisson, framkvæmdastjóri rekstrarsviðs bankans,  mun taka við stjórn bankasviðsins af Benedikt. Gísli Heimisson hóf störf hjá MP banka árið 2009 og hefur áratuga reynslu af störfum innan banka- og upplýsingatæknigeirans.

„Það er jákvætt að leitað sé til sérfræðinga bankans um að taka að sér þjóðhagslega mikilvæg ráðgjafarstörf. Verkefnið við afnám gjaldeyrishafta er brýnt og starfslok Benedikts eru í góðri sátt á milli aðila. Gísli Heimisson tekur við keflinu af Benedikt innan bankans. Þar er reynslumikill stjórnandi og bankamaður á ferð sem halda mun áfram uppbyggingu bankasviðs MP banka með áherslu á sérhæfða viðskiptabankaþjónustu.“ segir Sigurður Atli Jónsson forstjóri MP banka í tilkynningu.