Aflaverðmæti íslenskra skipa nam 133 milljörðum króna árið 2016 samkvæmt bráðabirgðatölum Hagstofu Íslands , samanborið við 151 milljarð árið 2015.

Hafði aflaverðmætið úr sjó minnkað um rúma 18 milljarða sem nemur 12,1% samdrætti á milli áranna. Nam aflaverðmæti í desember rúmum 6,5 milljörðum samanborið við 8,5 milljarða í desember 2015.

Samdráttur í aflaverðmæti botnfisks nam 9,9% frá fyrra ári en heildarverðmætið nam 92,7 milljörðum á síðasta ári. Var þorskur verðmætastur en aflaverðmæti hans á síðasta ári nam 58 milljörðum króna, sem er minnkun um 4,8% milli ára.

Verðmæti flatfisks dróst saman um 7,9% milli ára, og nam 9 milljörðum króna á síðasta ári, en verðmæti uppsjávaraflans nam 27,8 milljörðum árið 2016. Er það 19,6% samdráttur frá árinu 2015.

Þó jókst aflaverðmæti síldar um 11% en verðmæti loðnu dróst verulega verulega saman milli ára eða um 60,9%, fór úr því að vera 12,7 milljarðar árið 2015 í tæpa 5 milljarða á síðasta ári.

Verðmæti skel- og krabbadýra dróst svo saman um 12,9% frá árinu 2015, og nam það tæpum 3,5 milljörðum á síðasta ári.

Einnig var samdráttur í verðmæti afla sem seldur var í beinni sölu útgerða til vinnslu innanlands. Nam verðmæti hans 70,2 milljörðum króna á síðasta ári, sem er samdráttur um 13,9% frá árinu 2015.

Verðmæti afla sem keyptur er á markaði til vinnslu innanlands dróst hins vegar saman um 4,1% og nam hann 19,5 milljörðum króna.

Loks dróst einnig saman aflaverðmæti sjófrystingar, en hún nam rúmum 37 milljörðum árið 2015 samanborið við tæpa 44 milljarða ári fyrr.