Þriggja mánaða hækkun markaðsverðs íbúðarhúsnæðis utan höfuðborgarsvæðisins hefur aldrei mælst hærra frá upphafi mælinga árið 2000.

Þetta kemur fram í greiningu Arion banka á nýbyrtum tölum Hagstofunnar um hækkun verðbólgunnar, en hún hefur ekki verið hærri síðan í byrjun árs 2014 eins og Viðskiptablaðið sagði frá í morgun. Arion banki býst þó við að verðbólgan fari aftur í verðbólgumarkmið í apríl og verði við það mark fram á haust þegar þeir spá því að hún lækki á ný.

Íslandsbanki segir hins vegar ekki víst að verðbólgan fari aftur undir verðbólgumarkmið bankans á næstunni. Það tímabil verðbólgu undir markmiði sem nú er lokið hafi verið einsdæmi vegna lengdar þess. Greining Íslandsbanka bendir á að með 0,3% verðhjöðnun án húsnæðis sé farið að draga saman með vísitölunum með og án húsnæðis. Hafði Íslandsbanki spáð 0,4% hækkun nú milli mánaða, en Arion banki 0,45%, en raunhækkunin nam 0,56%.

Dregur úr líkum á stýrivaxtalækkun

Íbúðaverð hefur hins vegar hækkað um 13,2% síðustu 12 mánuði sem er eilítil lækkun frá því þegar hækkunartakturinn var hæstur síðasta sumar í um 24%. Setur Íslandsbanki það í samhengi við fréttir um vaxandi eftirspurn eftir eignum í þéttbýliskjörnum við jaðar höfuðborgarsvæðisins og nefna sem dæmi Reykjanesbæ og Árborg.

Bendir Íslandsbanki á að peningastefnunefnd Seðlabankans hafi búist við því að hægari hækkun íbúðaverðs myndi vega á móti þverrandi áhrifum af lækkun innflutningsverðs. Þessar fréttir um áframhaldandi hækkanir íbúðaverðs gætu því dregið úr líkum á að stýrivextir lækki í bráð.

Hefur vísitala íbúðaverðsins utan höfuðborgarsvæðisins hækkað um 3,2% síðasta mánuðinn, og undanfarna þrjá mánuði nam hækkunin 10,6%. Nefndi hagstofan sérstaklega reiknaða húsaleigu sem og verðhækkun á fötum og skóm sem ástæður fyrir verðbólguhækkuninni nú. Verð á fjölbýli á höfuðborgarsvæðinu hækkaði um 1,1% og verð á sérbýli um 0,7%.

Flugfargjöld hækka umfram væntingar

Aðrir undirliðir sem greiningardeild Arion banka benda á að hafi hækkað umfram væntingar þeirra eru flugfargjöld til útlanda sem hafi hækkað um 3%, en þeir höfðu gert ráð fyrir 2% hækkun. Matarkarfan hækkaði um 0,18% en bensínverð hélst óbreytt á milli mánaða. Húsgögn og heimilisbúnaður hækkaði svo um 1,6%.

Jafnframt hafi dregið úr verðlækkunum vegna innflutnings erlendra vara. Arion banki spáir því samt sem áður að 12 mánaða taktur verðbólgunnar lækki á ný og fari niður í 2,5% verðbólgumarkmiðið í apríl og haldist í kringum það í sumar og fram á seinni hluta ársins.

Eftir það fari hún svo að síga á ný, meðal annars vegna þess að 1. maí tekur gildi samningur milli Íslands og ESB sem fella niður tolla á yfir 340 vörunúmerum, þar á meðal súkkulaði, pizzum, pasta, bökunarvörum, villibráð, frönskum kartöflum og útiræktuðu grænmeti.