Alibaba hefur fengið samþykki frá kínverskum stjórnvöldum til þess að stofna einkabanka. Wall Street Journal greinir frá þessu.
Fyrirtækið lauk nýverið stærsta hlutafjárútboði sögunnar í New York þegar það aflaði 25 milljarða bandaríkjadollara. Alibaba verður stærsti hluthafi bankans með 30% hlut, en hann verður staðsettur í Kína þar sem fyrirtækið er með höfuðstöðvar sínar. Aðrir hluthafar eru fyrirtækjasamstæðan Fosun með 25% hlut, Wanxiang Group með 18% hlut og Yintai með 16%.
Jack Ma, stofnandi Alibaba, komst nýlega á topp listans yfir ríkustu menn Kína. Eru auðæfi hans metin á 25 milljarða bandaríkjadollara.
