Útgreiðslur úr þrotabúum föllnu viðskiptabankanna breyta engu um undirliggjandi skuldastöðu þjóðarbúsins, að sögn Arnórs Sighvatssonar aðstoðarseðlabankastjóra. Hann segir alltaf hafa verið gert ráð fyrir því í áætlunum Seðlabankans að innstæður úr þrotabúunum yrðu teknar út.

Greiningardeild Arion banka sagði í Markaðspunktum sínum í dag 300 milljarða króna útgreiðslu innstæðna úr Seðlabankanum auka skuldastöðu þjóðarbúsins án fjármálafyrirtækja í slitameðferð sem því nemur. Þessi þróun geri krónunni erfitt uppdráttar og allar áætlanir um afnám gjaldeyrishafta ótrúverðugar.

Í ritinu „Hvað skuldar þjóðin?“ sem Seðlabankinn gaf út í febrúar í fyrra kom fram að erlendar skuldir þjóðarinnar nemi 65% af vergri landsframleiðslu. Greiningardeildin telur hreina skuldastöðu þjóðarinnar við útlönd hins vegar nema 123% af vergri landsframleiðslu eftir útgreiðsluna. Mismuninn segir greiningardeild Arion banka skýrast af því að Seðlabankinn hafi fært innstæðuna sem erlenda eign en ekki sem skuld.