*

mánudagur, 10. desember 2018
Innlent 2. desember 2018 13:51

Arðgreiðslur fjölda félaga ólöglegar?

Arðgreiðsluaðferð sem notast hefur verið við í áraraðir stenst ekki lög samkvæmt dómi héraðsdóms.

Ingvar Haraldsson
Haraldur Guðjónsson

Arðgreiðsluaðferð sem stunduð hefur verið hjá fjölda eignarhaldsfélaga undanfarin ár er að líkindum ólögleg samkvæmt nýjum dómi Héraðsdóms Reykjavíkur. Dómurinn féll íslenska ríkinu í vil þann 19. október síðastliðinn gegn félaginu International Seafood Holdings SARL í Lúxemborg, sem var móðurfélag Iceland Seafood International (ISI).

Dómurinn byggir á úrskurði ríkisskattstjóra þar sem ISI var talið óheimilt að úthluta arði á grundvelli svokallaðrar hlutdeildaraðferðar. „Það er algerlega ný túlkun hjá ríkisskattstjóra og kom öllum endurskoðendum í opna skjöldu,“ segir Guðmundur Ingvi Sigurðsson, lögmaður International Seafood Holdings.Endurskoðendur sem Viðskiptablaðið hefur rætt við hafa sagt umrædda arðgreiðsluaðferð hafa verið viðtekna venju sem framkvæmd hafi verið í góðri trú  í áraraðir.

Því sé líklegt sé að háar fjárhæðir hafi verið greiddar út með aðferðinni. Samkvæmt dómnum var ISI óheimilt að greiða International Seafood Holdings arð þar sem arðgreiðslan byggði á hagnaði í dótturfélögum ISI sem ekki hafði verið greiddur upp til móðurfélags í formi arðgreiðslna. „Þetta kann að hafa slæm áhrif á mörg eignarhaldsfélög sem  hafa beitt þessari  aðferð á  undanförnum árum,“ segir Guðmundur. Skattayfirvöld hafi heimild til að taka upp skattskil sex ár aftur í tímann. Málinu hefur verið áfrýjað til Landsréttar. Í svari ríkisskattstjóra við fyrirspurn Viðskiptablaðsins segir að fordæmisgildi málsins muni byggja á dómi Landsréttar.

Arðgreiðslur frestist um ár

Guðmundur bendir á að ef túlkun ríkisskattstjóra og héraðsdóms standi í Landsrétti þá muni það hafa í för með sér að arðgreiðslur sem byggi á hagnaði dótturfélaga samstæðna kunni að frestast um ár. Fyrst þurfi að greiða arð úr dótturfélagi í móðurfélag og ári síðar þurfi móðurfélagið að taka ákvörðun um arðgreiðslu byggt á hagnaði fyrra árs.

Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð.