„Þann 7. október mun Arion banki opna nýtt útibú í Garðabæ og í nóvember opnum við aftur eftir breytingar í Vesturbæ Reykjavíkur. Útibúið í Garðabæ verður á nýjum stað í Hagkaupum við Litlatún en í Vesturbæ verður útibú bankans áfram í húsnæði Hótel Sögu sem er nýuppgert. Þar mun bankinn deila húsnæði með Póstinum. Á nýju ári mun Arion banki svo flytja útibú sitt á Akureyri á Glerártorg. Nýju útibúin eru öll hönnuð með stafrænar þjónustuleiðir Arion banka í huga. Markmiðið er að gera þjónustu bankans aðgengilegri og þægilegri fyrir viðskiptavini. Staðsetning útibúanna er valin með það í huga að þau séu í leiðinni fyrir fólk sem er að sinna daglegum erindum og áhersla er lögð á sveigjanlegri þjónustutíma,“ þetta kemur fram í tilkynningu frá bankanum.

Útibú Arion banka í Grundarfirði mun sameinast útibúinu í Stykkishólmi 5. nóvember en þó verður áfram hraðbanki á svæðinu.

„Þróunin í útibúanetinu tekur mið af mikilli eftirspurn eftir stafrænum þjónustuleiðum bankans en komum í útibú hefur fækkað á sama tíma og ásókn í stafrænar leiðir bankans hefur aukist,“ kemur jafnframt fram í tilkynningunni.