Arnarlax og Fjarðalax hafa skrifað undir samning um sameiningu félaganna undir nafni Arnarlax. Gert er ráð fyrir að sameiningin taki gildi fyrir lok júní. Samhliða mun Salmar, eitt stærsta laxeldisfyrirtæki í heimi, koma með afgerandi hætti inn í hluthafahóp Arnarlax og mun verða kjölfestufjárfestir með Bíldælingunum og feðgunum Matthíasi Garðarssyni og Kristian Matthíassyni.

Í tilkynningu frá félögunum segir að sameiningin efli mjög fiskeldi á sunnanverðum Vestfjörðum. „Það er mikil samlegð fólgin í sameiningunni og öll uppbygging verður markvissari. Félagið sækir auk þess nýtt hlutafé til að fjármagna metnaðarfull plön og styrkja þetta stærsta eldisfyrirtæki á Íslandi sem mun strax í ár framleiða tæp 10.000 tonn og velta tæpum 6 milljörðum. Félagið hefur alla burði til að verða verulega umsvifamikið á alþjóðlegum laxamarkaði.“

Félagið mun hafa 8.000 tonn eldisleyfi í þrem fjörðum; Arnarfirði, Tálknafirði og Arnarfirði. Félagið er auk þess með umsóknir í ferli og gerir ráð fyrir að tvöfalda þessi leyfi innan árs og stefnir á rúmlega 20.000 tonna framleiðslu 2020. Félagið hefur þegar lagt fram umsókn um leyfi í Ísafjarðardjúpi með fyrirhugaða starfsstöð á Bolungarvík og er sú framkvæmd þegar komin í umhverfismatsferli.

Forstjóri félagsins verður Kristian Matthíasson og er hann með aðsetur á skrifstofu félagsins á Bíldudal.