Í fjáraukalögum fyrir yfirstandandi ár er lagt til að 665 milljónir króna fari í viðbótarframlag til landbúnaðarins, þar af 300 milljónir beint í greiðslur til sauðfjárbænda miðað við fjölda kinda á vetrarfóðrum.
Eins og Viðskiptablaðið greindi frá í morgun bætast 25 milljarðar í aukin útgjöld við fjárlög ársins, en það er sama upphæð og upphaflega var lagt með að yrði afgangur af ríkisrekstrinum í ár.
Auk 300 milljónina er lagt til að 200 milljónir króna verði varið í svæðisbundin viðbótarstuðning, 100 milljónir í verkefni til kolefnisjöfnunar, nýsköpunar og markaðssetningar og 15 milljónir í úttekt á afurðastöðvakerfinu. Síðan er gert ráð fyrir allt að 50 milljónum króna til viðbótar í stuðning við hagræðingu í sláturhúsum byggt á þeirri úttekt.
Þorgerður Katrín Gunnarsdóttir landbúnaðar- og sjávarútvegsráðherra í ríkisstjórninni sem mynduð var í kjölfar kosninganna 2016, hafði lagt fram tillögur þar stefnt var á að greiða bændum fyrir að hætta eða draga úr sauðfjárrækt .
Var markmið tillagnanna að fé yrði fækkað um fimmtung vegna tekjuskerðingar bænda vegna lækkandi afurðaverðs en þeir gætu haldið allt að 90% af greiðslum sínum næstu 5 árin þrátt fyrir það. Hafði Benedikt Jóhannesson þáverandi fjármálaráðherra og formaður Viðreisnar, flokksins sem Þorgerður Katrín nú leiðir, sagt í Viðskiptablaðinu að hann vildi að framleiðslustyrkir yrðu afnumdir .
