Bandarísk stjórnvöld hafa ásamt Evrópusambandinu (ESB) kært kínversk stjórnvöld til Alþjóðaviðskiptastofnunarinnar (WTO). Kæran snýst um útflutningskvóta á hrávörum en með þeim eru stjórnvöld sögð hygla innlendum framleiðendum með því að veita þeim ósanngjarnt aðgengi að ódýru hráefni.

Kæran snýst um takmarkanir kínverskra stjórnvalda á útflutningi á hrávörum á borð við sink og báxít en Kínverjar eru einna stærstu framleiðendur þessara efna í heimi.

Með þessum útflutningstakmörkunum eru kínversk stjórnvöld sökuð um markaðsmisnotkun, sem leiðir til hærra heimsmarkaðsverðs, og þar með að brjóta reglur WTO. Reynt hefur verið að leysa deiluna með samningaviðræðum í tvö ár en kæran var svo lögð fram á þriðjudaginn.

Í kjölfar hennar tekur við tveggja mánaða samráðsferli og ef engin niðurstaða fæst úr því tekur WTO málið formlega upp. Beri bandarísk stjórnvöld og ESB sigur úr býtum í málinu fá þau heimild frá stofnuninni til þess að grípa til refsiaðgerða gegn kínverskum stjórnvöldum.

_____________________________

Nánar er fjallað um málið í erlendri fréttaskýringu í Viðskiptablaðinu í dag. Áskrifendur geta lesið blaðið á pdf-formi hér á vefnum og þeir sem ekki hafa lykilorð geta sótt um það hér .