Breski bankamaðurinn Tom Hayes var í dag dæmdur í fjórtán ára fangelsi fyrir að hafa hagrætt Libor millibankavöxtunum (London Interbank Offered Rate) með saknæmum hætti. Þetta er fyrsti dómurinn sem fellur í málinu en réttarhöldin hafa staðið yfir í tvo mánuði.
Hayes neitaði sök og sagði stjórnendur bankanna hafa vitað af athæfinu Hann sagðist hafa staðið í þeirri trú að hann væri ekki að gera neitt rangt og aðspurður sagði hann að eini hvatinn hefði verið að græða eins mikla peninga og mögulegt væri fyrir bankann.
Hayes var ákærður í átta ákæruliðum og sakfelldur fyrir þá alla. Hann starfaði sem verðbréfamiðlari hjá UBS og Citigroup árunum 2006 til 2010. Breskir fjölmiðlar segja að Hayes þurfi að minnsta kosti að afplána sjö ár áður en hann gæti átt kost á reynslulausn.