Jamie Dimon, forstjóri bandaríska risabankans, JP Morgan Chase, á að finna þá hvöt hjá sjálfum sér að stokka reksturinn upp og selja rekstrareiningar bankans með það markmið í huga að minnka umfang hans og gera reksturinn viðráðanlegri. Þetta gætu bæði fjármálayfirvöld í Bandaríkjunum og hluthafar bankans sæst á enda bankinn bæði of stór til að falla á sama tíma og hann skilar hluthöfum litlu.
JP Morgan greindi nýverið frá því að hann hafi tapað gríðarlegum fjárhæðum, tveimur milljörðum dala á evrópskum og bandarískum fyrirtækjaskuldabréfum. Ekki er útilokað að tapið verði meira en það getur veikt stöðu hans verulega.
Á ofangreindum nótum skrifar Sheila Bair, fyrrverandi stjórnarformaður bandaríska innstæðutryggingasjóðsins (FDIC), í nýjasta tölublaði bandaríska tímaritsins Fortune. Þetta er ekki í fyrsta skipti sem Bair mælir fyrir um uppstokkun á bankarekstri en í fyrravor mælti hún til þess að bandarískir bankar fetuðu í fótspor breskra og skilji að áhættusaman rekstur sinn frá annarri starfsemi.
Skrif Bair eru jafnframt á svipuðum nótum og fram kom í skýrslu FDIC fyrir ári þar sem skrifað var um nýjar reglur um yfirtöku og slit á fjármálafyrirtækjunum. Hefðu reglurnar gilt í bankahruninu í september og október árið 2008 er talið að breski bankinn Barclays hefði getað tekið yfir fjárfestingabankann Lehman Brothers sem féll um þetta leyti.
Sheila Bair segir í grein sinni í Fortune banka á borð við JP Morgan orðna svo stóra að ríkisstjórnin geti ekki staðið aðgerðalaus hjá og leyft þeim að fara í þrot. Hún segir engan í bandarísku stjórnsýslunni hins vegar ræða um það að grípa inn í rekstur bankanna og þvinga þá til að draga saman seglin eða brjóta þá upp. Á hinn bóginn taka senn ný lög gildi vestanhafs sem í einfölduðu máli gera einstakar deildir, svo sem eignastýringu og fjárfestingarstarfsemi, og dótturfélög risabanka að sjálfstæðum einingum sem má skilja frá heildinni steyti reksturinn á skeri.
