Ben Bernanke, fyrrverandi seðlabankastjóri bandaríkjanna, varar við því að lesa of mikið í að vaxtaferillinn sé að fletjast. Viðsnúningur ferilsins, þar sem skammtímavextir verða hærri en langtímavextir, hefur átt sér stað í aðdraganda hverrar einustu niðursveiflu síðustu 50 ára. Bernanke telur hinsvegar að í þetta skiptið sé þróunin fyrst og fremst afleiðing reglubreytinga hins opinbera og magnbundinnar íhlutunar annarra seðlabanka. Financial Times greinir frá .
Bernanke bætti við að „Skammtímahorfur hagkerfisins væru mjög jákvæðar,“, en hann ávarpaði fjölmiðla ásamt fyrrverandi fjármálaráðherrunum Hank Paulson og Timothy Geithner í tilefni viðburðar til að ræða þann lærdóm sem draga mætti af fjármálahruninu 2008.
Vaxtaferillinn snérist síðast við árið 2006, í aðdraganda hrunsins, en Geithner sagði fjármálakerfið mun stöðugra í dag, þótt verkfæri yfirvalda væru að vísu ekki jafn vel til þess fallin að takast á við alvarlegt áfall.
Bernanke og Paulson vöruðu hinsvegar við að þótt hrun væri ekki á næsta leiti, væru horfur í fjármálum hins opinbera ekki ýkja góðar. Góðar efnahagsaðstæður eins og þessar væru akkúrat rétti tíminn fyrir ríkið til að taka sig á í fjármálum og greiða niður skuldir, en ríkissjóður væri þess í stað rekinn með halla í dag.
