BHM hefur gefið út yfirlýsingu brugðist við áformum Lilju Alfreðsdóttur menntamálaráðherra, um að kennaranemar fái sérstaka styrki til náms , til þess að auka aðsókn í kennaranám.
Í yfirlýsingunni kemur fram að BHM fagni þessum hugmyndum ráðherra, en bendir jafnframt á að svipaða leið þurfi að fara til að tryggja nauðsynlega nýliðun í öðrum stéttum háskólamenntaðra.
Yfirlýsingu BHM má sjá í heild hér að neðan:
Nýlega viðraði mennta- og menningarmálaráðherra, Lilja Alfreðsdóttir, hugmyndir um að Lánasjóður íslenskra námsmanna (LÍN) greiði sérstaka styrki til kennaranema til að stuðla að aukinni aðsókn í námið og koma í veg fyrir kennaraskort í landinu. BHM fagnar þessum hugmyndum ráðherrans en bendir jafnframt á að svipaða leið þyrfti að fara til að tryggja nauðsynlega nýliðun í öðrum stéttum háskólamenntaðra. Ítrekað hefur komið fram að meðalaldur t.d. ljósmæðra og lífeindafræðinga er hár og á næstu árum munu stórir hópar þeirra fara á eftirlaun. Sá fjöldi nemenda sem nú stundar nám í þessum greinum mun ekki nægja til að fylla í skörðin.
BHM hvetur stjórnvöld til að grípa til róttækra aðgerða svo tryggja megi nauðsynlega nýliðun í þessum starfsstéttum og, eftir atvikum, í öðrum stéttum háskólamenntaðra sérfræðinga. Meðal annars ættu stjórnvöld að kanna möguleika á því að LÍN veiti nemendum í vissum greinum sérstaka námsstyrki.
